Presnac

1 kilo kruha od prvega dana
1 litra mleka
4 jaja
20 dek cizibi
25 dek putra (al margarini)
15 dek cukara
kanela
 Za kožicu:
30 dek cveta
5 dek putra
2 vele žlice cukara
1 jaje
malo soli

Kruh se zreže na feti i saku fetu na tanke fetice. Stavi se va zdelu. Mleko, cukar i putar se stepli va padele dok se putar ne rastopi ( 1 dec mleka treba pustit za kožicu). Kad se to ohladi poleje se po kruhe da se kruh natopi.

Kožica
Cvet, jaje, cukar, mleko i malo soli se zamesi i rastakaja.
Va natopljeni kruh se dodaju cizibi, poleje se z jaji ka se prej stuču i pospe z kanelun. Promeša se tako da se fetice kruha ne raspadu ( da ne pride kašasto).
Forma se namaže z malo ulja i va nju se stavi kožica da rubi vise vanka. Smesa od kruha se stavi nutra, poravna i pokrije z kožicun ka visi preko. Stavi se peć uru vremena na 200 st C.

Ovako presnac dela gospa Blaženka Srdoč z Matulj ka se j to navadila od svoje matere va Rukavce. Neki va smesu stave i 20 dek napol skuhaneh riži.

Kroštule

1 jaje
3 žutnjaka
2 vele žlice cukara
4 žlice ulja
 4 žlice belega vina
cveta koliko pita
oko pol litre ulja za frigat
cukar za posipat


Od sega se zamesi srednje trdo testo. Tanko se razvalja i reže na traki 15 put 3 centimetri. Saka traka se na sredine malo zareže i kroz tu škujicu obrne. Stavi se frigat na teplo ulje. Frigano se pospe z cukaron.

Fritule

4 žlice ulja
5 dek cukara
3 žutnjaka
pol kila cveta
2 deci mleka
 2 deka kvasa
korica od lemoncina
malo soli
oko pol litre ulja za frigat


Se skupa se va zdele dobro stuče da pride glatko testo. Pusti se digat na teplen meste. Z žlicun se zimaju komadi testa i stavjaju frigat na teplo ulje. Frigano se pospe z cukaron.

Olita

kilo riži
kilo cukara
pol kila masti
malo kapuli
malo varofulca
 malo ribanega lemoncina
10 dag cizibi
mrvice od kruha
litra prašće krvi


Riži se skuhaju i ohlade. Doda se na maste zažućena kapula, ribani kruh, cukar, varofulac, lemoncin, ciziba i na kraje krv. Se se to skupa zmeša i s ten se nadevaju olita.
A onda ih se zapre s jednen drvcom i stavi va vrelu vodu kuhat. Prej neg se jedu, malo se speču va peće.
Pusni judi, ča će reć zvončari, maškare i prtenjaki voleli su pojist olita. Provajte i vi, sigurno će van se pjažat.
(Ovaj recept preuzet je iz "Cvrčka", lista "OŠ Dr. Andrija Mohorovičić")