Priša je i taj dan kega san tako željno čeka. Nedeja je ... Nebo j' vedro i bez i jednega oblačića, a moj otac i ja se spravljamo va lov. Moje srce je tuklo kot batić od veselja. Obukli smo se i zeli se ča nan treba. S nami je ša i naš brek. Pomalo smo se počeli prtit. Oko mene se videlo selo do sela. Priroda je bila nekako čudna. Lišće je kantalo. Pomalo smo hodili i bili sve bliže i bliže vrhu. Otac mi je reka da sada treba hodit pomalo i šegavo da nas divljač ne bi čula. Brek se je stalno mota oko naših nog. Mislel san da sanjan. Na kraju jednega brega zagledali smo divlje svinje ke su ležale. Nisan se moga nagledat, a ni načudit. Pomalo smo prihajali sve bliže, one su i dalje tamo ležale. Ni njin ni na kraj pameti bilo ča ih čeka. Odjedanput su počele bižat. Moj otac je diga pušku, nacilja i opali. Najveća ka je imela oko stopedeset kil pala je kot vreća. Kad smo se približili našen trofeju bil san ponosan na mojega oca. Srce mi je tuklo, a pred našemi nogami leža je vepar. Brzo za ten su došli i drugi lovci ki su šli s nami to jutro. Si skupa smo se z vepron kalevali z Učke dok je vetar poveda štoriju od lovu.

I danas me koža od vepra domišlja na moj prvi lov.